БИШКЕК, 14-авг. — Sputnik. Россия-Кыргыз өнүктүрүү фонду "Бизнес Инвест Компани" ЖЧКсына жабдуу менен атайын техника сатып алуу үчүн 1,7 миллион доллар жеңилдетилген кредит берди. Кеп Ысык-Көлдөгү эң ири Жыргалаң көмүр кенинин ишин жандантуу жөнүндө болуп жатат.
Бул кен 1959-жылы иштей баштаган, анын запасы 18 миллион тонна деп бааланууда. 2012-жылдын сентябрь айында ишканада өрт чыгып иш токтоп калган.
"Кендин борбордук, батыш жана чыгыш участкаларында үч шахта бар. 2022-жылдын май айында биздин ЖЧК чыгыш участогунда даярдык иштерин баштаган. Компания электр өткөрмө линияларын орнотуп, подъезддик жолдорду оңдоду. Учурда вахталык шаарча куруп жатат. Муну менен катар шахтадан күнүнө 100-120 тонна көмүр алынууда. Болочокто өндүрүш кубаттуулугу жылына 50 миң тоннага жетет. Долбоорду жүзөгө ашырууга РКӨФ бизге 1 миллион 733 миң доллар бөлдү. Бул каражатка биз биринчи кезекте россиялык жабдууларга буйрутма бердик", — деди ЖЧКнын директору Кубатбек Керимов.
РКӨФ башкаруучулугунун жетекчиси Артем Новиков кен 11 жылдан бери иштебей турганын, бирок президент тапшырма бергенден кийин аны ишке киргизүүгө даярдыктар көрүлө баштаганын эске салды. Долбоор импортту алмаштырып, 126 жумушчу орун түзүүгө багытталган.
"Бул участокту 2017-жылы суу басып калган. Ошого байланыштуу суу сордургучтар орнотулган (азыр 2,5 миң куб метр суу сордурулуп, 420 метр органикалык масса алынды). Учурда бургулоо иштери жүрүп, көмүр сыртка чыгарылууда. Алгачкы 1,2 миң тонна көмүр Каракол жылуулук электростанциясына жеткирилди", — деди Новиков.
Кенди "Бизнес Инвест Компани" ЖЧКсы мамлекеттик "Кыргызгеология" ишканасы менен биргеликте ишке киргизип жатат. Өндүрүлгөн көлөмдүн 20 пайызы, башкача айтканда, ар бир тоннадан мамлекеттик ишканага 255 сомдон берилет.
Эске салсак, кечээ жакында министрлер кабинети Ысык-Көлдө 11 жылдан кийин Жыргалаң кенинин иши жанданганын жарыялаган. Бирок кээ бир кыргызстандыктар, анын ичинде облустун мурдагы башчысы Эмилбек Каптагаев мунун баары калп экенин билдирген. Алардын айтымында, Жыргалаңдын эски шахтасын суу басып калган. Ал эми министрлер кабинети жеке компаниянын мурдатан бери иштетип келе жаткан мини-шахтасын көрсөткөнүн белгилешкен. Кийинчерээк президент Садыр Жапаров бул билдирүүлөрдү төгүндөгөн.