БИШКЕК, 11-авг. — Sputnik. Өздөрүн Ички иштер министрлигинин кызматкери катары тааныштырып элден акча талап кылгандар кармалды. Бул тууралуу УКМК билдирди.
Маалыматка караганда, Кылмыш-жаза кодексинин 343-беренеси ("Пара талап кылуу") боюнча козголгон кылмыш ишинин алкагында алты адамдан турган топ кармалды.
© Фото / пресс-служба ГКНБ КР
"Алар өздөрүн милиция кызматкери катары тааныштырышкан. Бир кызды кылмыш жоопкерчилигине тартып, интернетке компроматтык мүнөздөгү видеолорду жайылтабыз деп коркутуп 300 миң сом талап кылышкан", — деп айтылат маалыматта.
8-августта бул иш боюнча негизги айыпталуучулар кармалып, УКМКнын тергөө абагына киргизилген. Тинтүү учурунда алардын жанынан белгисиз тапанча, рация жана башка атайын жабдыктар табылган.
Учурда алардын шериктерин аныктоо боюнча комплекстүү ыкчам-иликтөө иш-чаралары жүрүүдө.
Ушул сыяктуу кылмыштын түрлөрүнөн жапа чеккен жарандар (0312) 66-04-75 телефондоруна чалып билдире алышат. Анонимдүүлүккө кепилдик берилет.