"Газпром Кыргызстан" өзүнө алган милдеттемелерди толук аткарат. Бул тууралуу Арзымат Алдаяров Sputnik Кыргызстан радиосуна маек куруп жатып билдирди.
Анын айтымында, учурда Казакстан, Өзбекстан менен тийиштүү сүйлөшүүлөр жүргүзүлүүдө.
"Ошто газдаштыруу боюнча абал татаалыраак. Анткени ал жакка газ Өзбекстандан келет. Ал эми Ташкентте былтыр газ тартыштыгы байкалганын көрдүк. Кыргызстан газ өткөрүүчү түтүктүн этегинде болгондуктан, айрым оорчулуктар болуп калууда. Быйыл Казакстан, Өзбекстан "Газпром" менен жол карталарга кол коюп, анын негизинде эки өлкө жылытуу мезгилинде Россиядан газ алат. Ошондуктан быйыл эч кандай маселе болбойт. Мындан тышкары, мамлекеттик органдар менен Кыргызстандын газын иштетүү боюнча 4-5 жылдан бери талкуулар жүрүүдө. Өлкөнүн түштүгүндө "Кыргызнефтегаздын" балансында беш миллиард куб газдын кени бар. Ал үчүн чоң каражат керектелет. Ошондуктан "Газпром" менен дагы сүйлөшүүлөр жүргүзүлүүдө. Маселе чечилсе Кыргызстандын түштүгүн өзүбүздүн газ менен камсыздоого даяр болобуз", — деди Алдаяров.
Ошондой эле ал газды улуттук валютада сатып алуу боюнча сүйлөшүүлөр мамлекеттик деңгээлде жүрүп жатканын кошумчалады.