БИШКЕК, 7-авг. — Sputnik. Президент Садыр Жапаров Бостери айылындагы (Ысык-Көл облусу) пляждагы окуяда каза тапкан 23 жаштагы жигиттин өлүмү боюнча ишти көзөмөлүнө алды. Бул тууралуу анын маалымат катчысы Эрбол Султанбаев билдирди.
Интернетте Көлгө эс алууга келип, "Золотые пески" эс алуу жайындагы пляжда каза тапкан жигит боюнча маалымат чыккан. Анын жакындары сабалганын айтса, бирок милиция талмасы кармап көз жумган деген версияны таратты.
Агасы видеокайрылуу жасап, 6-августка караган түнү иниси достору менен пляждагы барда отурганда жанындагы жети-сегиз бала менен пикир келишпестик жаралып, сабалганын айтты. Алган жараатынан А.Б. ошол жерде каза болгон. Мындан улам ал ошол окуяны видеого тартып калгандар болсо жөнөтүүнү суранды.
Ошол эле учурда каза болгон жигиттин достору да прокуратура жана башка бийлик жетекчилерине кайрылып, тергөөнү калыс жүргүзүүнү өтүнүштү.
Ысык-Көл облустук милициясы маркумдун денесин караган учурда эч кандай күч колдонуунун изи байкалбагандыгын билдирди.
"Президент Жапаров коомчулукта резонанс жараткан, Ысык-Көл облусунун Бостери айылында 23 жаштагы жарандын өлүмү боюнча ишти жеке көзөмөлүнө алды. Укук коргоо органдарына окуянын чоо-жайын ар тараптуу жана объективдүү иликтөө тапшырмасы берилди", — деген Султанбаев.