БИШКЕК, 5-авг. — Sputnik. “Чек талап кылып, байге утуп ал!“ лотереясына коюлган байгелерди сатып алуу үчүн 151 миллион сомдук тендер эки ирет өтпөй калып, үчүнчүсү жарыяланды. Бул тууралуу маалыматты Мамлекеттик сатып алуулар порталынан көрүүгө болот.
Салык кызматы биринчи жолу 8-июнда тендер жарыялап, ага төрт компания катышкан. Бирок алар тиешелүү талаптарга жооп бербегендиктен сунуштары четке кагылган.
Ал эми экинчи тендер 29-июнда электрондук порталга коюлган. Анда шектүү жагдайлардан улам өтпөй калган. Мыйзам боюнча кызыкчылыктардын кагылышуусун жана адам факторун болтурбоо максатында конкурска катышкан компаниялардын аталыштары аягына чейин жашыруун болушу керек. Бирок комиссия протоколду ачып жатканда катышуучулардын аталыштары ачык көрүнүп турган. Мындан улам кечээ, 4-августта, бир булактан түз сатып алуу ыкмасын колдонуу менен кайра конкурс жарыялады. Жалпы суммасы 151 миллион сомду түзөт.
Лотереянын байгесине эмнелер сатып алынат жана тендердик баасы:
20 электромобиль — 37,1 миллион сом;
1000 даана iPhone — 80 миллион сом;
1000 даана смартфон — 18,5 миллион сом;
Дубайга алты жолдомо (эки адамдык) — 1,4 миллион сом;
40 даана Dyson маркасындагы стайлер — 2 миллион сом;
300 даана ноутбук — 12 миллион сом.
Белгилей кетсек, "Чек талап кылып, байге утуп ал!" лотереясынын утушунун биринчи этабы 26-июндан 1-июлга чейин өтүп, 1 183 баалуу байге ойнотулган. Анын ичинде 10 электромобиль жана Дубайга эки кишилик үч жолдомонун жеңүүчүлөрү аныкталган. Бирок кийин лотереянын талаптары бузулганы үчүн бир электромобиль, чет өлкөгө бир жолдомо, 21 iPhone, 19 смартфон, сегиз ноутбук жана Dyson маркасындагы бир фендин утуштары жараксыз деп табылган.
Натыйжада Салык кызматы 1-август күнү калган жеңүүчүлөргө байгесинин сертификаттарын тапшырган. Ал эми жарандар байгелерин колуна үч айдын ичинде аларын билдирген.
Утуштун экинчи этабы жыл соңунда болот, анда 1 244 байге ойнотулат, анын ичинде 10 батир, 11 электромобиль, чет өлкөгө эс алууга төрт жолдомо, 521 даана iPhone14, 519 смартфон, 158 ноутбук жана Dyson маркасындагы 21 фен коюлмакчы.