БИШКЕК, 28-июл. — Sputnik. Президент Садыр Жапаров Чүйдүн Кемин районунда ири майнингдик ферма иштеп жатканынын тастыктады.
Белгилей кетсек, кечээ өлкөдө электр энергиясынын тартыштыгына карабай жаңы жылдан тарта майнинг-ферма тынымсыз иштеп жатканы тууралуу журналисттик иликтөө чыккан. Анда бул ферма кубаттуулугу 30 мегаваттык, бир районго жете турган электр кубатын колдонуп жатканы айтылган.
Мамлекет башчы чынында эле Кемин районуна майнинг-ферма курганга уруксат берилгенин, алар бир киловатт саат үчүн 5,04 сомдон төлөп жатканын айтты.
"Себеби Кемин подстанциясынын күч-кубаты жетет. Экинчиден, жайдын күнү бизде электр энергиясы толук жетиштүү, атүгүл ашып калат. Эч бир жакка сата албайбыз. Ошондуктан энергетика системасына пайда түшсүн деп оор жүктөмдү көтөрө алчу участокторго уруксат берип жатабыз. Эгер кыштын күнү кыйынчылык келе турган болсо, үч ай токтотуп коебуз. Калган тогуз ай бою иштей беришсин. Ушул эле ферма алты айда 480 миллион сом энергетиктерге, 225 миллион сом салыкка төлөп берди. Бул акчанын баары мамлекеттин, ошол эле элдин пайдасына түштү. Мындан ары ал салыктарды жергиликтүү бюджетке төлөйт. Албетте, райондо жылыштар пайда болот", — деди Жапаров.
Президент Кыргызстанда электр энергиясы кыштын күнү гана тартыш болорун айтып, жетишпеген көлөмдү чет өлкөдөн үч сомдон сатып аларын белгиледи. Аны майнинг-фермага сатканда энергетика системасына 2 сом 04 тыйын таза киреше калат деп эсептейт.
Мындан сырткары, ал Камбар-Ата-2 ГЭСинин аймагына да кубаттуулугу 30 мегаваттык майнинг курууга уруксат берилгенин билдирди. Мамлекет башчынын айтымында, 2010-жылы ишке кирген гидростанция 120 мегаватт көлөмдү иштеп чыгууда. Бирок сыртка алып чыгуу мүмкүнчүлүгү 90 гана мегаватт.
"13 жылдан бери калган 30 мегаваты абага сиңип жатыптыр. 6 миллиард 816 миллион киловатт-саат энергиядан акчалай эсептегенде 3 миллиард 275 миллион сом жоготууга учураптырбыз. Бул үчүн буга чейинки шалаакы жетекчилердин баарын жоопко тартса болот. Эмне үчүн 13 жылдан бери жоготуу болуп жатса көңүл бурушкан эмес. Биз Камбар-Ата-2 ГЭСинин ичине майнинг-ферма койгонго уруксат бердик. Ал майнингди курууга эле инвестор 20 миллион доллардын тегерегинде акча салат. Майнинг-ферма ишке кирсе мындан ары жоготуу болбойт. Акча энергетиктерге түшөт. Тагыраагы, элдин чөнтөгүнө түшөт деген эле кеп", — деди президент.
Ошондой эле Жапаров ар бир жасап жаткан ишин жети эмес, жетимиш жолу өлчөп туруп анан чечкиндүү кадамдарга барып жатышканын белгиледи.