БИШКЕК, 26-июл. — Sputnik. Sputnik Литванын шеф-редактору Марат Касем Латвиядан чыгып кетти. Бул тууралуу РФтин Тышкы иштер министрлигинин расмий өкүлү Мария Захарова билдирди.
Ал Sputnik радиосунун эфиринде маек курганын РИА Новости жазды.
"Кылмыш иши менен коркутуу кайра жанданышы мүмкүн болгондуктан Марат Касем бул өлкөдөн чыгып кетти", — деди ал.
Захарова белгилегендей, Латвиянын бийлиги журналисттин жанын койбой турганы айдан ачык болуп калган.
Апрель айынын соңунда Касемди Латвиянын түрмөсүнөн сыртка чыкпоо боюнча тил каттын негизинде кое беришкен. Ал айып пулун төлөп, сыртка чыгууга уруксат берилгенден кийин өлкөдөн кеткен.
Касем — Латвия жараны. Бир нече жылдан бери Москвада жашап, Sputnik Литва да кирген "Россия сегодня" медиатобунда иштейт. 2022-жылдын 30-декабрында үй-бүлөлүк шартына байланыштуу Латвияга келип, полиция 5-январда кармаган. Ошол эле күнү соттун отуруму өтүп, адвокатынын күрөөгө бошотуу талабына карабай эки айга камакка алуу чечими чыккан.
РФ ТИМинин расмий өкүлү Мария Захарова окуяны диктатордук режимдин Касемдин принципиалдуулугу үчүн өч алуусу деп сыпаттаган. Анын айтымында, жарым жыл мурун Касем кесибинен улам Прибалтика өлкөлөрүнүн бийлиги артынан түшүп алганын билдирген.
Россияда адам укугу боюнча ыйгарым укугу бар Татьяна Москалькова БУУнун адам укугу боюнча жогорку комиссарына кайрылып, Касемдин кармалышы сөз эркиндигине кол салуу экенин, Латвия журналисттердин укугун коргоо багытындагы эл аралык милдеттемелерин бузуп жатканын белгилеген.
Кийинчерээк Латвиянын Мамлекеттик коопсуздук кызматы Касем Евробиримдиктин санкциясын бузду деп шектелип жатканын, тыңчылыкка айыпталбаганын жар салган.