"... Ал мыйзамда орус тили дискриминация болсун деген түшүнүк жок. Тескерисинче, орус тили расмий тил катары колдонулат деп турат. Бул норма Баш мыйзамда да бар. Ал нормалар кала берет. Мугалимдер менен дарыгерлерге тиешеси жок. Элестетиңиз, мектепке орус улутундагы орус тил мугалимин алып жатабыз дейли. Анан аны "сен кыргызча билбейт экенсиң" деп кызматка албай коебузбу? Бизге кыргыз тили кандай керек болсо, орус тили дагы ошондой керек. Анткени КМШ өлкөлөрү менен орус тилисиз иштей албайсың. Кытай, араб өлкөлөрүнө, ошол эле Европа өлкөлөрүнө барганда дагы орус тилинде сүйлөшүп жатабыз. Бул жерде биз өз тилибизди да толук өздөштүрөлү деген эле маселе. Мамлекеттик кызматкерлердин, депутаттардын сүйлөгөндөрүн байкасаңар. Жарымы орусча, жарымы кыргызча. Эч бирибиз же толук орусча, же толук кыргызча сүйлөбөйбүз. Аралаштырып кете беребиз", — деди Жапаров.