БИШКЕК, 20-июл. — Sputnik. Министрлер кабинетинин төрагасы Акылбек Жапаров Россия өкмөтүнүн төрагасы Михаил Мишустин жана Армениянын премьер-министри Никол Пашинян менен телефон аркылуу сүйлөштү. Бул тууралуу өкмөттүн маалымат кызматы кабарлады.
Билдирмеге ылайык, Жапаров Мишустин менен кыргыз-орус кызматташтыгынын актуалдуу маселелерин, анын ичинде соода-экономикалык, социалдык-гуманитардык жана инвестициялык чөйрөдө биргелешкен долбоорлорду ишке ашырууну талкуулаган.
"Алар Евразия экономикалык биримдигиндеги интеграциялык кызматташуу маселелерине өзгөчө көңүл бурушту", — деп айтылат маалыматта.
Жапаров менен Пашинян эки тараптуу кызыкчылыкты жараткан түрдүү тармактардагы кыргыз-армян кызматташуусунун актуалдуу маселелерин кеп кылышкан. Тараптардын экономикалык байланыштарды мындан ары өнүктүрүүнүн жолдорун да сүйлөшкөнү айтылды.