Сокулукта акча көбөйтүп берем деп элди 10 млн. сомго алдап кеткен аял кармалды

Шектүү катары 38 жаштагы Бишкек шаарынын тургуну Ж.А. кармалып, камакка алынды.
Sputnik
БИШКЕК, 7-июл. — Sputnik. Сокулук районунда WhatsАpp мессенжеринен бир нече тайпа түзүп, кыска убакытта акчаларын эки эсе көбөйтүп берем деп жабырлануучуларды 10 миллион сомго алдап кетти деген аял кармалды. Бул туурасында Чүй облустук милициянын маалымат кызматы билдирди.
Күн-Туу айылынын жашоочусу А.Ж. РИИБге арыз менен кайрылып, А. аттуу аял акчасын көбөйтүп берүүнү убадалап 187 миң сомун алып, ошол бойдон бербей жатканын айткан.
"Тергөө учурунда кийинки жагдай такталган. А. аттуу аял WhatsАpp мессенжеринде карапайым жана улуу курактагы адамдардан турган бир нече тайпа түзүп, аларга "кыска убакыттын ичинде акчаларын эки эсе көбөйтүп берем" деп алдоо жолу менен акча котортуп алган. Учурда ал аялга чара көрүү боюнча бир топ жарандардан арыз түшүп, алдап алынган каражат 10 миллион сомдон ашык экени такталды", — деп айтылат маалыматта.
Бул факт боюнча Кылмыш-жаза кодексинин 209-беренеси ("Алдамчылык") менен кылмыш иши козголгон. Ыкчам иликтөө иштеринин натыйжасында Бишкек шаарынын 38 жаштагы Ж.А. аттуу тургуну кылмышка шектүү катары кармалып, соттун чечими менен камакка алынды.
Чүй милициясы кармалган аялдан жабыр тарткандар болсо Сокулук РИИБге 03134 53380, 0706 360006, 0552360006 (Whatsapp), 0700343803 телефондору аркылуу кайрылууга чакырат.
Президенттин маалымат катчысы телефон алдамчыларынан сак болууга чакырды