Садыр Жапаров Монголияга үч күнгө мамлекеттик сапар менен барат

Кыргызстандын Монголиядагы элчилигинин расмий ачылыш аземи болору да күтүлүүдө.
Sputnik
БИШКЕК, 6-июл. — Sputnik. Мамлекет башчы Садыр Жапаров 9-11-июлда Монголиянын президенти Ухнаагийн Хурэлсухтун чакыруусу менен Улан-Баторго мамлекеттик сапар менен барат. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
Маалыматка ылайык, сапардын алкагында Жапаров өлкөнүн президенти Ухнаагийн Хурэлсух, премьер-министри Лувсаннамсрайн Оюун Эрдэнэ, Монголиянын Улуу Мамлекеттик Хуралынын төрагасы Гомбожавын Занданшатар менен эки тараптуу жолугушууларды өткөрөт.
Тараптар эки өлкөнүн ортосундагы соода-экономикалык, инвестициялык, маданий-гуманитардык тармактардагы эки тараптуу кызматташтыктын абалын жана мындан аркы өнүгүү келечегин талкуулашат.
Ошондой эле Улан-Батордо Кыргызстандын Монголиядагы элчилигинин расмий ачылыш аземи да болот.
Сапардын жүрүшүндө достук жана кызматташтык мамилелерин тереңдетүү жөнүндө биргелешкен декларацияга, ошондой эле экономика, санариптештирүү, айыл чарба, курчап турган чөйрөнү коргоо, токой экосистемаларын өнүктүрүү жана башка тармактарда кызматташуу жөнүндө макулдашууларга кол коюлат.
Буга катар Бишкек жана Улан-Батор шаарларынын, Чүй облусу менен Хэнтий аймагынын ортосунда боордош байланыштарды түзүү боюнча макулдашуулар түзүлмөкчү.
Инвесторго тоскоол болгондор менен өзүм эсептешем! Жапаров "Асман" шаарына капсула салды