БИШКЕК, 26-июн. — Sputnik. Коопсуздук кеңешинин катчысы Марат Иманкулов Алматы шаарында Борбор Азия өлкөлөрү жана Россиянын коопсуздук кеңештеринин катчыларынын жолугушуусуна Афганстандагы кырдаал боюнча сунуш киргизди.
Ал КРдин регионалдык коопсуздугунун кызыкчылыктарына да зыян келтириши мүмкүн болгон региондогу өлкөлөрдүн коопсуздугунун учурдагы бир катар чакырыктарын жана коркунучтарын белгилеген.
"Өз ара иш алып барууну арттыруу планында Иманкулов эл аралык дипломатиянын жеткиликтүү ыкмалары жана гуманитардык акциялары менен Афганстанда тынчтыкка жана туруктуулукка жетишүүнү, жаштардын радикалдашуусун болтурбоо максатында алар менен жигердүү жана биргелешип иштөөнү белгилеген. Кесипкөй теологдорду жана дин кызматчыларын окутуу боюнча жалпы мамиле жана тажрыйба алмашуу маселесин иштеп чыгууну сунуш кылды", — деп билдирген президенттин маалымат кызматы.
Коопсуздук кеңешинин катчысы киберкоопсуздук жаатындагы кызматташтыкты кеңейтүү, гибриддик коркунучтарга жана согуштарга каршы туруу жаатында тажрыйба алмашуу туурасында айткан. Ар кандай эл аралык аянтчаларда биологиялык коопсуздук тематикасын иштеп чыгуу жана биологиялык куралды чыгарууга жана жайылтууга жол бербөө, ошондой эле чек ара ведомстволорунун ортосундагы кызматташтыкты арттыруу зарылдыгын белгилеген.