БИШКЕК, 14-июн. — Sputnik. Кыргызстандын президенти Садыр Жапаров менен тажикстандык кесиптеши Эмомали Рахмондун жакында Чолпон-Атада өткөн жолугушуусунда кыргыз тарап чек ара маселеси боюнча тажик тарапка сунуш киргизгенин КР Коопсуздук кеңешинин катчысы Марат Иманкулов билдирди.
"Президент Жапаров өз позициясын айтты. Бизде саясий эрк бар. Тажикстанга да, башка өлкөгө да эч кандай аймактык дооматыбыз жок", - деди Иманкулов "Биринчи радионун" эфиринде.
Ал ошондой эле жолугушуулардын биринде эмне үчүн алыскы тарыхка кайрылбаш керек экенин тамаша-чынга салып айтып бергенин эскерди.
"Мен бир жолугушууда тамашалап Кыргыз каганатын эстейли, ал кандай кенен аймактарды ээлеген... Мындан 50-100 жыл мурункуну карасаң көп нерсени өзгөртүүгө туура келет. Ал кезде кээ бир мамлекеттер жок болчу. Ооба, чек ара маселесин чечүү оңой эмес. Бирок бул бир гана жол менен чечилчү маселе. Сүйлөшүүлөр, дипломатия аркылуу. Кээде компромисске барыш керек. Татаал аймактар бар, алар боюнча жергиликтүү калктын пикирин эске алуу менен чечим кабыл алабыз. Эки өлкөнүн лидерлеринин жолугушуусунда президентибиз өзүнүн сунушун айтты, алар карап жатышат”, - деп жыйынтыктады Коопсуздук кеңешинин катчысы.
Буга чейин ал чек ара боюнча өкмөттүк комиссиялардын сүйлөшүүлөрүндө тажик тарап 1924-1927-жылдардагы карталарды колдонуу керектигин билдиргенин айткан.