БИШКЕК, 9-июн. — Sputnik. Пентагон жума күнү Украина үчүн эки миллиард доллардан ашуун суммага курал-жарак пакетин даярдаганын жар салат. Бул тууралуу Bloomberg АКШ администрациясындагы маалымат булактарына таянып жазды.
Кабарда Украинанын коопсуздугуна көмөктөшүү демилгесинин алкагында бөлүнгөн акча Hawk ракеталарын жана Patriot зениттик-ракеталык комплекс үчүн ракеталарды сатып алууга жумшалары айтылган.
Bloomberg агенттигинин маалыматы боюнча мында кеп Lockheed Martin өндүрүшүнөн чыккан Patriot Advanced Capability-3 (PAC-3) зениттик жана Raytheon Technologies чыгарган GEM-T ракеталары тууралуу болуп жатат.
Москва Батыш мамлекеттерине Украинага жеткирилген курал-жарак эч нерсе өзгөртпөй турганын, жаңжалды гана узартарын эскертип келет. РФ ТИМинин лидери Сергей Лавров АКШ менен НАТО курал жөнөтүп жана кадрларды даярдап берип тирешүүгө түз катышып жатканын билдирген.