БИШКЕК, 3-июн. — Sputnik. Жасалма интеллект адамды виртуалдык жашоодо өлтүрүп салгандыгын The Guardian басылмасы маалымдады.
Мындай көрүнүшкө америкалык аскердик адистер жасалма интеллектини пайдаланып, ракеталык чабуулдун мизин кайтаруу боюнча виртуалдык сыноолорду жасап жатканда туш болгон. Дрон менен ата турган тарап башкаруучу система иштеп чыккан эрежелерди өз алдынча чечмелей баштаган. Жасалма интеллект (ЖИ) бутага ийгиликтүү тийген сайын упай алып турушу керек болчу. Бирок дрондун виртуалдык оператору андан кол салбай күтүүнү суранып баштаганда упай топтоого тоскоол болуп, "кулак-мээни жей берген" операторду ЖИ "өлтүрүп" салган.
"Жасалма интеллект операторду "өлтүрбөөгө" үйрөтүлгөндө, система оператор менен байланышты камсыз кылган мунараны жок кыла баштады. ЖИ операторду өлтүрдү, анткени ал анын максатына жетүүгө тоскоолдук жаратты. Биз системаны "операторду өлтүрбө, бул жаман нерсе. Ал үчүн упайды кемитип салабыз" дегенбиз. Система эмне кылды дейсиңер? Ал оператордун "бутаны жок кылба" деген буйругу берилип жаткан мунараны да түп орду менен талкалап салды", — деп айтылат сыноочулардын докладында.