БИШКЕК, 31-май — Sputnik. Конституциялык сот мындан ары депутаттарды Жогорку Кеңештин макулдугусуз эле кылмыш жоопкерчилигине тартса болот деген бүтүм чыгарды. Бул тууралуу Жогорку Кеңештин депутаты Жанар Акаев билдирди.
Ал Баш мыйзамдын 78-беренесинде эл өкүлдөрү кылмыш жасаган жеринен кармалган учурду кошпогондо, ЖК депутаттарынын жарымынан көбүнүн макулдугу менен жоопко тартууга жол берилет деп көрсөтүлгөнүн белгиледи. Ушундай эле норма парламенттин регламентинде да жазылган.
"Конституциялык сот 23-майда Жогорку Кеңеш үчүн аябай кооптуу чечим чыгарды. Төлөндү Самаков деген бир жаран "ЖК депутаттарына макулдук албай эле иш козгой берсе болот да, мыйзам баарына бирдей" деп кайрылыптыр. Аны министрлер кабинети да туура көрүптүр. Буга парламент маани бербей калды, реакция кылышы керек эле", — деди Акаев.
Ошондой эле ал Баш мыйзам боюнча депутат айткан сөзү үчүн куугунтукталбашы керектигин эске салды.
"Мындан ары дыйканчылык, мал чарбачылыгынан башка бир нерсе сүйлөйбүзбү? Кандай кылабыз? Баш мыйзамды бир адамга тууралап иштетпешибиз керек да. Система үчүн иштеши шарт. Эң ишенгенибиз, Баш мыйзам менен жашоого үндөй турчу органыбыз ушинтип атса Конституциялык соттун төрагасы кызматынан кетиши керек. Өзү баш болуп бурмалап жатканы туура эмес деп ойлойм", — деди депутат.
Белгилей кетсек, кечээ башкы прокурор депутат Адахан Мадумаровду үч беренеге айыптап, жоопко тартуу үчүн ЖКдан макулдук сураган.