БИШКЕК, 25-май — Sputnik. Американын 2022-жылдагы мамлекеттик карызы карызкор болгон 13 өлкөнүкүнө барабар болуп, Россияныкынан 107 эсе көбөйгөн. Бул туурасында РИА Новости улуттук финансы министрлеринин маалыматтарынын негизинде жазды.
АКШнын былтыркы жылдын жыйынтыгы боюнча чыккан карызы рекорддук көрсөткүчкө — 31,42 триллион долларга жеткен. Ири карызкор делген 13 өлкөнүн милдеттенмелери бул 31,4 триллион суммадан 23 миллиардга аз болууда.
Экинчи орунда 9,59 триллион долларды чапчып Япония, үчүнчүдө 3,75 триллион доллар менен Кытай турат.
Британия өкмөтүнүкү 3,03 триллион, Италиянын борбордук бийлигиники 2,88 триллион доллар экени айтылды. Андан кийинки орундарда: Франция, Индия, Германия, Испания, Канада, Бразилия, Түштүк Корея, Сингапур жана Австралия турат. Булардыкы жалпысынан 12,15 трлн. долларды түзөт.
Ал арада Россиянын былтыркы мамлекеттик карызын эсептей келгенде 294,8 миллиард экени аныкталып, Американыкына караганда 107 эсе, Японияныкына салыштырмалуу — 33, Кытайдыкына карата 13 эсе аз экени маалым болду.
Өлкөлөрдүн көбү 2023-жылдын биринчи кварталына карата мамлекеттик карыздын көлөмүн ачыктай элек, бирок алгачкы үч айдын жыйынтыгы менен алганда Россияныкы 15,2 миллиард долларга же 5,2 пайызга кыскарган. Азайган тенденция тууралуу Япония (-0,2 пайыз) да билдирген.
АКШнын карызы 0,1 пайызга өсүп, жаңы рекордду жаратып 31,46 триллион долларга жетип, мыйзамдуу түрдө белгиленген чектен ашып кетти.
Мындай көрүнүштөн соң Финансы министрлиги финансылык операцияларды улантуу боюнча чукул чараларды кабыл алып, ал эми АКШнын администрациясы Конгресске лимитти көтөрүп берүүгө чакырык салган. Учурда өлкөдө чекти жогорулатуу боюнча кызыл чеке талаш жүрүүдө. Эгерде алар бир пикирге келбесе, өлкөдө 1979-жылдан берки биринчи дефолт болот.