БИШКЕК, 23-май — Sputnik. Балыктын майы кандын уюп калышын алдын алып, иммунитетти бекемдеп, терини, көздүн көрүүсүн жакшыртат. Бул тууралуу Sputnik радиосуна диетолог Римма Мойсенко айтып берди.
"Балыктын майынын пайдасы көпчүлүккө маалым. Анда D витамини көп болгондуктан Советтер Союзу кезинде итийди алдын алуу үчүн бардык балдарга беришчү. Анда дээрлик бардык витаминдер бар. D витамини бардык азыктардан кальцийди "сууруп" чыгарууга жардам берет, бул өзгөчө балдар менен карылар үчүн маанилүү. А витамини болсо териге жакшы таасир этет, иммунитетти көтөрүп, көздүн көрүүсүн жакшыртат. К1 жана К2 витаминдери уюп калган канды жөнгө салып, тромбду алдын алат. Мындан тышкары, К2 остеопороз жана бөйрөктүн өнөкөт ооруларын алдын алууга жардам берет", – деп түшүндүрдү Римма Мойсенко.
Анын айтымында, балык майынын баалуулугун андагы омега-3 арттырат, ал эң күчтүү антиоксидант болуп саналат.
"Кан тамыр күчтүү болушу үчүн биз тамак-аштан алган май кислоталарында сөзсүз омега-3 да болушу керек", – дейт Римма Мойсенко.
Бирок канчалык пайдалуу болсо да балыктын майын ашыкча жегенге болбойт. Айрым адамдарга андан такыр баш тартууга туура келет.
"Кээ бирлердин балык майына аллергиясы бар, аларга колдонууга болбойт. Уйку бези ферменттерди жетиштүү деңгээлде иштеп чыгара албаган адамдар балыктын майын колдонбогону оң. Балык майын аш кыла албаган, кеч картайып узак жашаган адамдардын организми бардык азыктардан омега-3 май кислотасын ала алат, аларга балык майын колдонууга болбойт", – деди Римма Мойсенко.