БИШКЕК, 19-май — Sputnik. Бишкекте 1998-жылкы Айза Улан кызынын өлүмү боюнча дагы бир адам кармалды. Бул тууралуу Башкы прокуратура маалымат таратты.
Билдирмеге ылайык, Бишкек шаардык прокуратурасы Улан кызынын өлүмү боюнча кылмыш ишин тергөөнү улантууда.
Тергөөнүн алкагында М.Л.Ж. аттуу жаран күбө катары суракка алынып, тергөө органдарына учурда айыпталып жаткан У.Э.Ндин автокырсыкка тийиштүүлүгү тууралуу олуттуу маалыматтарды билдирген.
"Андан кийин Р. у. Д. аттуу жаран М.Л.Ж. жеке маалыматтарын социалдык тармактарга таратуу жана каралоо менен коркутуп, андан жалган көрсөтмө берүүнү жана У.Э.Нге каршы мурда берилген көрсөтмөлөрдөн баш тартууну талап кылган. Р. у. Д. айыпталуучу У.Э.Н. таанышы болот", — деди мекемеден.
Күбөгө кысым көрсөтүү фактысы катталгандан кийин Р.у.Д. аттуу жаран кармалып, Бишкек шаарынын ШИИБнин убактылуу кармоочу жайына киргизилген.
"Андан аркы ыкчам тергөө иш-чараларынын жүрүшүндө Р. у. Д. "ВЭБкам студияларынын" уюштуруучусу экендиги аныкталган. Ал Бишкек шаарынын аймагында порнографиялык материалдарды таратууга байланышкан виртуалдык интим кызматтарын көрсөтүү үчүн жаш кыздарды тартуу аркылуу мыйзамсыз иш жүргүзүп келгендиги такталды. Тергөө аракеттерин жүргүзүүдө укукка каршы иш-аракетти күбөлөндүргөн буюмдук далилдер табылып, алынды", — деп айтылат маалыматта.
Эске салсак, 12-майда Айза Улан кызынын өлүмү боюнча чыныгы шектүү кармалган.
Адегенде кылмышка шектүү катары ички иштер органдарынын мурдагы кызматкери У.Н.А. аттуу жаран кармалган болчу. Бирок анын оорусуна байланыштуу сот үй камагына чыгарган. Кийин Бишкек шаардык прокуратурасы аталган кылмыш ишти өз өндүрүшүнө алып, тергөө амалдарын жүргүзгөн. Натыйжада кырсык болгон учурда машинанын рулунда У.Н.А. эмес, анын У.Э.Н. аттуу уулу болгону аныкталган. Жол кырсыгы үстүбүздөгү жылдын январь айында болгон.