БИШКЕК, 18-май – Sputnik. Чылымды насыбай, кальян жана электрондук тамекилерге алмаштырууга аракет кылбаңыз, алардын ден соолукка зыяны бирдей. Мындай эскертүүнү Саламаттык сактоо министрлиги таратты.
Мекеме чылым адам организминин кайсы органына кандай таасир берерин тизмектеди:
мээге тийгизген терс таасири инсультка алып келет;
жүрөккө тийгизген зыяны инфарктыга учуратышы мүмкүн;
кан тамырлардын да иштешин бузат, бул кан басымдын көтөрүлүшүн шарттайт;
уйку безинин иши бузулат, кант диабетин пайда кылат;
бут, колго тийгизген таасири гангрена кылат;
ошондой эле өпкө, ооз көңдөйү, бөйрөк, боор жана башка органдарда рак илдетин пайда кылышы мүмкүн;
аялдардын жана эркектердин репродуктивдүү системасына кесепетин тийгизет.
"Көмүртек кычкыл газы жана 7000ден ашык уулуу зат организмде кычкылтектин жетишсиздигин пайда кылат. Никотин — бул уу. Чылым, насыбай, кальян, электрондук тамекини сатып алуу менен сиз ооруну да сатып аласыз. Адегенде тамекиге, андан кийин тамеки колдонуунун кесепеттерин дарылоого чыгым болосуз", — деп айтылат министрликтин эскертүүсүндө.