Фрунзе (азыркы Бишкек) шаарында 1943-жылы СССРдин Илимдер академиясынын кыргыз филиалы ачылып, чоң илимге чыйыр салынган. Жаңы түптөлгөн мекемени согуш маалында академик Константин Скрябин жетектеп, Кыргыз ССРинин айыл чарба, экономикасына кол кабыш кылып, геология, биология, химия, тил жана адабият институттары өз ишмердүүлүгүн баштаган. 11 жылдан кийин Кыргызстандагы эң негизги илимий жай өз алдынча академия болуп, аны Иса Ахунбаев башкарган.
Академияда кийин тарых, медицина, энергия жана суу ресурстарын башкаруу, зоология жана паразитология институттары ишке кирип, илимпоздор экспедицияларды уюштуруп, түрдүү станцияларды куруп, республиканын кокту-колот, тоо-ташын, аска-тоолорун аралап илимий эмгектерин жараткан.
Ал эми 60-70-80-жылдары ата мекендик жетишкендиктер арбып чоң долбоор, курулуш, өндүрүш академик, профессорлордун жардамы жок ишке ашчу эмес. Анда өлкөдө жалпы 18 илимий-изилдөө институту советтик жана чет элдик илимий мекемелер менен жакшы мамиледе болуп далай дүйнөлүк ачылыштарга катышкан.