БИШКЕК, 10-май — Sputnik. Батыш аткаминерлеринин Борбор Азияга жасаган кезектеги сапары Украинадагы абалга байланыштуу. Бул тууралуу саясат таануучу Марс Сариев Sputnik радиосуна курган маегинде билдирди.
"Азыркы тапта АКШга Борбор Азия мамлекеттерин Россияны колдоодон баш тарттыруу маанилүү болуп жатат. Регион аркылуу Россияга санкциялык товарлар өтүп жатканы эч кимге сыр эмес. АКШ Россияга саясий жана экономикалык жактан басымды күчөтүү үчүн Борбор Азия мамлекеттерине санкция салышы мүмкүн", — деди Сариев.
Анын айтымында, бүгүн биздин аймак үчүн бурулуш болуп жатат.
"Мындай шартта Борбор Азия Батыштын позициясын карманарынан күмөнүм бар. АКШнын басымына карабастан аймактагы мамлекеттер Батыштын позициясын кармануудан баш тартып, нейтралдуулукту сактайт. Айрыкча буга чейин ар дайым көз салып гана чектелген Кытай позициясын так айта баштады. Пекин кийинки кезекте өзү турганын билип Россияны колдоп жатат. Батыштын максаты — алгач Россияны уратып, Кытайды алсыратуу менен баш ийдирүү", — деди Сариев.
Ал ошондой эле Батыштын абалды дестабилдештирүү үчүн сценарийлерин атады:
Афганистандагы террордук топторду Борбор Азияга киргизүү;
Синьцзянды "өрттөө", мында Кытайдын башка аймактары дагы көтөрүлүп чыгышы мүмкүн.