Даректүү тасмаларды мыкты тарткан. Режиссёр Лиля Турусбекованын сүрөттөрү

Лиля Турусбекова 1933-жылы 8-майда Фрунзе шаарында жарык дүйнөгө келген. Атасы атактуу жазуучу Жусуп Турусбеков фронттон көз жумганда ал тогуз жашта болгон. Борбор калаадагы мектепти аяктаган соң Москвадагы Мамлекеттик кинематография институтунун режиссёрлук факультетине тапшырып, кыргыз жаштарынын арасынан биринчилерден болуп ЖОЖду аяктап, мекенге кайтып келген. Жаш киночу 1955-жылдан баштап Фрунзедеги студияда эмгектенип, ал жакта 20дан ашык даректүү тасмаларды тарткан. 60-жылдары толук метраждуу кинофильмдерди тартуу менен алектенген. Турусбекова чыгармачылыгында жалпы 32 даректүү кинокартина тартып, "Советтик Кыргызстан" киножурналынын 65 чыгарылышын даярдаган. Ошондой эле башка кесиптештеринин тасмаларда редактору болгон. Кыргыз ССРинин маданиятына эмгек сиңирген ишмер 2001-жылы 68 жашында бул дүйнө менен кош айтышкан.

1 / 15

Жусуп Турусбеков менен Гүлсүн Молдахматова кызы Лиля менен

2 / 15

Жусуп Турусбеков кичинекейлерге китеп окуп берүүдө. Болочоктогу киночу Лиля солдон экинчи турат. Сүрөт 1941-жылдын жазында тартылган

3 / 15

Оңдо биринчи турган 15 жаштагы Лиля жана анын жанында болочоктогу атактуу кино оператор Марлес Туратбеков. Чолпон-Атадагы балдар санаторийи, 1948-жыл

4 / 15

Москвадагы Мамлекеттик кинематография институтунда окуган кез. 1954-жыл

5 / 15

Лиля Турусбекова туңгуч кыргыз айым режиссёрлорунун бири. Ал "Кыргызфильмде" алгачкылардан болуп иштеп жүргөн жылдар. Фрунзе, 1956-жыл

6 / 15

Кинорежиссёр Юз Герштейн менен иштешкен учур. 60-жылдар

7 / 15

Залкар жазуучу Чыңгыз Айтматов Москвага жолугушууга барган учур. Аны коштогон Төлөмүш Океев менен Лиля Турусбекова

8 / 15

Иш үстүндөгү таланттуу режиссёр кесиптеши менен. Турусбекова "Кыргызфильмде" 35 жылдан ашык эмгектенген

9 / 15

"Кыргыз кереметин" баштоочулары Москвада. Алардын арасынан Геннадий Базаров, Төлөмүш Океев, Лиля Турусбекованы көрүүгө болот

10 / 15

КРдин эл артисти, кинооператор Кадыржан Кыдыралиев, режиссёр Лиля Турусбекова, Кыргыз эл жазуучусу Бексултан Жакиев жана режиссёр Геннадий Базаров. Фрунзе шаары, 1974-жыл

11 / 15

Лиля Турусбекованын 50 жаш кутман курагы менен куттуктаганы келген Төлөмүш Океев

12 / 15

Кинорежиссёр чыгармачылыгында негизинен даректүү тасмаларды тартуу менен алектенген. Ал кесиптештери Бакыт Карагулов, Геннадий Базаров менен

13 / 15

Лиля Турусбекова белгилүү окумуштуу Санжарбек Данияровго турмушка чыгып, жубайлар Асел, Гюзел аттуу эгиз кыздуу болгон. 1959-жыл

14 / 15

Айтматовдун дачасында меймандар. Сүрөттө солдон оңду көздөй экинчи турган Санжарбек Данияров, андан кийин Лиля Турусбекова, Чыңгыз Айтматов, Керез Шамшыбаева, Шаршен Усубалиев, Валентина Исабаева. 1979-жыл

15 / 15

Кыргыз ССРинин маданиятына эмгек сиңирген ишмер 68 жашында көз жумган.

Тема боюнча:

— Жашоосун киного айланткан режиссер. Актан Арым Кубаттын сүрөттөгү ирмемдери

— Айтматов кадырын салып ачык кадрларды калтырткан. "Биринчи мугалимдеги" ирмемдер