БИШКЕК, 5-май — Sputnik. Президент Садыр Жапаров бүгүн, 5-майда, кыргызстандыктарды өлкөнүн Конституция күнү менен куттуктады. Бул тууралуу өлкө башчынын маалымат кызматы кабарлады.
Жапаров Баш мыйзамда мамлекеттин жогорку баалуулуктары адам, анын жашоо-турмушу, укуктары жана эркиндиги деп таасын белгиленгенин айтты. Ошондой эле эгемендүүлүк, элдик бийлик, өлкөнүн аймактык бүтүндүгү, укук үстөмдүгү жана демократия салттары бекемделгенин, бул негизги документте жаңы кыргыз мамлекеттүүлүгүнүн түзүлүшүнүн укуктук, коомдук-саясий жана социалдык-экономикалык өбөлгөлөрү аныкталганын билдирди.
"Конституциянын жаратмандык дарамети чектелбейт, ал зарыл болгон социалдык-экономикалык, коомдук-саясий жана башка шарт-жагдайлардын жаралышына жараша улам жаңы кырынан ачыла берет. Ошондуктан эгемендүүлүк жылдарында конституциялык реформалардын жүрүшүндө Баш мыйзамга жаңы реалдуулуктарды чагылдырган кошумча укуктук механизмдер жана ченемдер бир нече жолу киргизилген", — деген Жапаров.
Азыркы Кыргызстандын демократиялык, саясий, укуктук, экономикалык жана идеологиялык тирегинин калыптанышынын негизи дал ушул Конституция болуп саналарын белгиледи.
"Бүгүнкү күндө өлкөбүздүн алдында турган негизги милдеттер жалпы таанылган демократиялык ынанымдарды ырааттуу бекемдөө, адамдын жана жарандын укуктары менен эркиндиктеринин кепилдиктерин чыңдоо болуп эсептелет. Кыргыз Республикасынын ар бир жараны Конституциябыздын дем-күчүн, маанисин жакшы билүүгө тийиш", — деп билдирген Жапаров.
Эртеңки күндүн укуктук таянычы болгон Баш мыйзам өлкөнүн өнүгүшүнүн кепилдиги болуп кала берерин кошумчалаган.