БИШКЕК, 3-май — Sputnik. Афганстанды узак жылдар оккупация кылган АКШ менен НАТОго мүчө өлкөлөр жоопкерчилик алып, аталган өлкөнүн калыбына келишине каражат салышы керек. Бул тууралуу Кытайдын Афганстан боюнча атайын өкүлү Юэ Сяоюн айткан.
РИА Новости ал Бириккен Улуттар Уюмунун башкы катчысы менен жыйырма өлкөнүн Афганстан боюнча атайын өкүлүнүн жолугушуусуна катышканын жазды. Иш-чара Катарда өткөн.
"АКШ менен НАТОнун өлкөлөрү Афганстанды 20 жыл оккупация кылып турушту. Алар Афганстандын реконструкциясы боюнча жоопкерчиликти алышы керек. Жолугушуунун бир топ катышуучулары санкцияларды алып, пайдаланууга тыюу салынган банк эсептерин ачуу зарылдыгын белгилеп, маселени көтөрүштү. Афган активдери боюнча маселени улам көтөрүп жаткан мамлекеттер көбөйгөндүктөн, Батыштын өлкөлөрүнө бул нерсени тоготпой коюу кыйын болуп бара жатат. Жети миллиард доллар өлчөмүндөгү банктардагы тыюу салынган эсептеги акчаларды пайдаланууга уруксат берилиши керек", — деген Юэ Сяоюн.
Катарда өткөн эки күндүк кеп-кеңештер жыйынында гуманитардык тармакта Афганстан туш болгон көйгөйлөр жана аталган өлкөдө туруктуулукту бекемдөө жолдору талкууланган.