БИШКЕК, 29-апр. — Sputnik. Садыр Жапаров бүгүн, 29-апрелде, курулушу баштала турган "Асман шаарынын" долбоору менен таанышты. Ага жакында капсула салынарын президенттин маалымат кызматы билдирди.
"Асман" экошаарында алдыңкы санариптик телекоммуникациялык технологиялар колдонулары айтылды.
Өлкө башчы ошондой эле саатына 450 жүргүнчүнү кабыл ала турган аэровокзал комплекси курулуп жаткан "Ысык-Көл" (Тамчы) эл аралык аэропортун да карап чыкты. Аэровокзал 2003-жылы курулуп, учурда жүргүнчүлөрдүн агымын көтөрө албай калган. Аэропорттун модернизациясы аяктаса өлкөдөгү ички авиакаттамдар көбөйүп, ошондой эле туристтердин агымын көбөйтүүгө мүмкүнчүлүк жаралары айтылды.
Садыр Жапаров ошондой эле Балыкчы — Кочкор темир жол тилкесинин курулуш иштери тууралуу маалымат алып, темпти басаңдатпоо үчүн бардык чараларды көрүүнү тапшырды.
Буга катар мамлекет башчы "Тамчы" эркин экономикалык аймагы түзүлө турган жерге да барды. Келечекте бул аймакта өндүрүштүк жайлар, туристтик комплекстер жана башка объектилер жайгаштырылып, чет элдик коноктордун ири агымын кабыл алууга мүмкүндүк берери айтылды.
Ошону менен бирге президент спорттук туризм комплексинин курулушу менен таанышты. Негизги басым спорттук жана ден соолукту чыңдоо туризмин өнүктүрүүгө жасалат. Бул комплекс Ысык-Көлдүн жээгинде кызыктуу жана сапаттуу эс алууга шарт түзөт.
2021-жылдын июль айынын башында президенттик администрация Ысык-Көл районундагы Тору-Айгыр айылынын жанында 500 миң калкы бар инновациялык "Асман" шаарын куруу пландалып жатканын билдирген. Бийлик "Асман" Кыргызстандын экономикалык жана туристтик борборуна айланарын айткан. Келечектеги шаардын долбоордук чечимдерин иштеп чыгуу боюнча ведомстволор аралык топ түзүлүп, мамлекеттик дирекция негизделген.