БИШКЕК, 27-апр. — Sputnik. Сууну товар катары сатууга да убакыт келет. Азыр БУУда сууну товар катары кабыл алуу боюнча маселе каралууда. Эгерде ал кабыл алынса, сатабыз. Бул туурасында президент Садыр Жапаров "Кабар" улуттук агенттигинде маек берип жатып айткан.
Журналист ага суу, электр кубаты боюнча товар алмашуу саясаты жана бир катар депутаттар тарабынан сууну байлык катары карап сатуу боюнча суроолор коюлуп жатканын айтып, собол узаткан. Анда депутат Адахан Мадумаровдун ысымы аталган.
"Сууну товар катары сатууга да убакыт келет. Азыр БУУда сууну товар катары кабыл алуу боюнча маселе каралып жатат. Кабыл алынса анан сатабыз да", — деген Жапаров.
Ал эл өкүлү тууралуу өзүнүн ичи чыкпаган пикирин билдирген.
"Мадумаровдун болсо тили эле сайрайт, колунан эч нерсе келбейт. Ошончолук эле акылдуу болсо сууну товар деп, аны сатуу боюнча бир барак мыйзам жазып киргизип койбойт беле..." — деген ал.
Депутат Адахан Мадумаров
© Фото / пресс-служба Жогорку Кенеша
Ал учурдагы электр энергиясы тармагында коррупциялык иштер азайды деген пикирде.
"Азыр мурдагыдай уурулук жок. Ошол үчүн карызы үч жылдан бери 137 миллиард сомдон бир тыйын өйдө көтөрүлбөй турат. Кудай буюрса, бул карыздарынан да кутултабыз. Убакыт керек. Албетте, уурулукту 100 пайыз жок кылып салдык дегенден алысмын. Бирок мурдагыдай системалык уурулук жок", — деген сөзүн жыйынтыктаган президент.