БИШКЕК, 27-апр. — Sputnik. Жогорку Кеңештин депутаты Эмил Токтошев азык-түлүк продукцияларын экспорттоодо тоскоолдуктар жаралбашы үчүн сунуштарын айтты.
© Фото / пресс-служба Жогорку Кенеша
Эл өкүлү Россия жакында эле Кыргызстандан балык, колбаса, сүт ташууга тыюу салганын эске салды. Мындан улам ал олуттуу жана чечкиндүү ири реформа жасоо керектигин белгиледи.
Ага ылайык, өкмөттүн түзүмүндөгү тиешелүү кызматтардын функцияларын карап чыгып, багыттарына жараша президенттин алдында эки агенттик түзүү шарт.
Биринчиси — Кыргыз азык-түлүк көзөмөлү агенттиги. Ал ата мекендик продукциянын сапатын көзөмөлдөп, айыл чарба жана азык-түлүк коопсуздугун күчөтүү функциясын аткарат. Анын карамагына Ветеринардык кызмат, Фитосанитардык кызмат жана Санитардык көзөмөлдөө кызматтары кирет. Бул продукциялардын сапатына жооп берген мамлекеттик орган болуп калат.
Алар айыл чарба жана азык түлүк продуктуларын көзөмөлдөөдө чогуу-чаран, бирдиктүү терезеден иш алып баруусу керек. Ошол эле учурда сапатты жакшыртуу менен ишкерлерге ыңгайлуу шарт түзгөнгө өбөлгө болот.
Экинчиси — эл аралык мааниге ээ Кыргыз экспорт агенттиги. Карамагына Экономика жана коммерция министрлигиндеги экспортко тийиштүү функциялар өткөрүп берилет. Бирдиктүү терезе принцибинде экспорттук компанияларды каттап жана тейлеп, юридикалык коштоо менен алардын кызыкчылыгын коргоосу зарыл.
Токтошевдин айтымында, президенттин алдында иштеген агенттиктер жогорку юридикалык статуска ээ болуп, өндүрүшчүлөрдүн экспорттук потенциалын жогорулатууга жана кошуна өлкөлөр менен теңата кызматташканга шарт түзүлөт.