БИШКЕК, 27-апр. — Sputnik. Бишкектин Ленин райондук соту Маданият, маалымат, спорт жана жаштар иши министрлигинин "Азаттык" медиасынын ишин токтотуу боюнча өтүнүчүн канааттандырды.
Эскерте кетсек, 26-октябрда аталган министрлик "Азаттык медиа" сайтынын ишин эки айга чектөө чечимин кабыл алган. Мындай чара кыргыз-тажик чек арасындагы сентябрдагы окуялар боюнча "өлкөнүн маалымат мейкиндигинде Кыргызстандын улуттук кызыкчылыктарына каршы келген материалдарга жооп кайтаруу үчүн кабыл алынды" деп айтылган.
Башкача айтканда, министрлик тарабынан 2022-жылдын 16-сентябрында "Учурдагы убакыт" ресурсунда ("Азаттык" медиасынын ведомстволук түзүмү) "Кыргызстан менен Тажикстандын чек арасындагы катуу кармаш | ASIA" аттуу видеоматериалы жана эфирде кастык маанайдагы сөздөрдүн колдонулганы, Кыргызстан тараптын Тажикстанга кол салуусу деген тариздеги такталбаган, Баткен облусундагы окуяларды чагылдырууда коомдогу кырдаалды курчутуп, жарандардын ортосунда кастыкты, дискриминацияны жана бөлүнүүнү пайда кылган маалыматтар аныкталган.
Буга байланыштуу министрлик 2022-жылдын 17-сентябрында "Азаттык медиа" мекемесине ММК чөйрөсүндөгү мыйзамдардын нормаларын так сактоо жана Кыргыз Республикасынын интернет мейкиндигинде такталбаган (жалган) маалыматтардан коргоо боюнча кайрылуу жөнөтүп, видеону өчүрүүнү өтүнгөн.
Бирок бул кайрылууга көңүл кош мамиле жасалып, "Азаттык Медиа" тараптан жооп кайтарылбай, тиешелүү чаралар көрүлгөн эмес. Мындан улам ишин эки айга токтотуу чечими кабыл алынган.
Министрлик Бишкектин Ленин райондук сотуна 23-январда кайрылган. Алгач отурум 9-февралга белгиленип, кийин мөөнөтү жылган.
"Азаттык медиа" райондук соттун чечимине каршы жогорку инстанцияга кайрыларын маалымдады.