БИШКЕК, 26-апр. — Sputnik. Бишкекте дагы бир нече мектепке жарылуучу зат коюлганы тууралуу маалымат түштү. Бул тууралуу шаардык милициянын маалымат кызматы билдирди.
Бомба тууралуу кабардан кийин №33, 67, 90, 51 жана Oxford менен "Рифал" жеке мектептеринин окуучулары эвакуацияланганы айтылууда.
Бул апрель айында эле үчүнчү жолу кайталанып жаткан көрүнүш. Андан мурун дагы бир эле учурда ар кайсы мекемеге маалымат түшкөн. Текшерүүдөн кийин эч нерсе табылган эмес.
Өз кезегинде Ички иштер министрлиги билип туруп террордук акт (бомба) тууралуу жалган маалымат тараткан жаран беш жылга чейин эркинен ажыратыларын эскерткен.