БИШКЕК, 26-апр. — Sputnik. БУУнун Дүйнөлүк азык-түлүк программасы (БУУ ДАТП) Россия өкмөтүнүн каржылык колдоосу менен Баткен облусунун Кадамжай районундагы Шакшак айылында өндүрүштүк-логистикалык борборду ишке киргизди. Бул тууралуу кабарчы жеринен билдирди.
Маалыматта бул Билим берүү жана илим министрлиги менен бирге ишке ашканы айтылды.
ДАТП Тармактык тамактануу институтунун (SIFI) техникалык колдоосу менен жергиликтүү кооперативдин базасында түзүлгөн логистикалык борбор Кыргызстандын улуттук мектеп тамактануу программасын туруктуу ишке ашырууга өбөлгө түзөрүн белгиледи.
Борбор мектептер менен жергиликтүү өндүрүүчүлөрдүн ортосунда мамлекеттик-жеке өнөктөштүк аркылуу байланыш түзүп, жакшыртылган логистикалык чынжырдын жардамы менен жергиликтүү дыйкандарга жаңы базарларда соода кылууга мүмкүнчүлүк берери айтылды.
Мындан сырткары, аталган борбордо сакталган азык-түлүк менен Кадамжай районундагы 40тан ашуун мектептин окуучуларын тамак-аш менен камсыздоого болот.
Логистикалык борбордун ачылыш аземине РФтин Ош шаарындагы консулу Андрей Бибишев, БУУнун Азык түлүк программасынын Кыргызстандагы өкүлү жана директору Кожиро Накай, Россиянын Тармактык тамактануу институтунун эксперти Анатолий Максимов жана БУУнун Азык түлүк программасынын кызматкерлери, жергиликтүү бийлик өкүлдөрү катышты.
© Sputnik / Зульфия Тургунова
"Мектеп тамактануусу маанилүү ролго ээ, балдардын ден соолугун биринчи орунга коюп, адам капиталына инвестициялоо — келечекке карай мыкты салым деп эсептейм. Россия Федерациясынын бул логистикалык борборго каржылык колдоо көрсөтүүсү эки элдин достугун чыңдайт. Борбордун курулуш иштерине РФ өкмөтү жалпы 207 миң доллар каржылык колдоо көрсөттү", — деди РФтин Ош шаарындагы консулу Андрей Бибишев.
Ошондой эле тамак-аш коопсуздугу жана сапаты боюнча мыйзамдарга, эрежелерге жана стандарттарга ылайык иш алып барууну камсыз кылуу максатында техникалык жана жөнгө салуучу көрсөтмөлөрдү берди.
"Биз Россия Федерациясынын өкмөтүнө Кыргызстандын мектептериндеги тамактануу программасына көрсөткөн колдоосуна ыраазычылык билдиребиз", — деди БУУ ДАТПнын Кыргыз Республикасындагы өкүлү жана директору Кожиро Накай.
Бул сынамык борбордун иш-аракеттери ийгиликтүү аткарылса, аны үлгү катары өлкөнүн башка аймактарына жайылтуу мүмкүнчүлүгү жаралмакчы.
Логистикалык борбор үч объектиден турат. Алар: жашылча сактоого ылайыкталган кампа жана изотермикалык техника, кайра иштетүү комплекси жана мектептердеги айыл чарба продукциясынын сапатын текшерүү үчүн мобилдик лаборатория. Россия Федерациясынын өкмөтүнүн каржылоосу менен БУУ ДАТП борборду керектүү жабдуулар, изотермикалык техника жана мобилдик лаборатория менен камсыз кылды. Аны менен катар эле тамак-аш коопсуздугу жана сапаты боюнча мыйзамдарга, эрежелерге жана стандарттарга ылайык иш алып барууну камсыз кылуу максатында техникалык жана жөнгө салуучу көрсөтмөлөрдү берди.