БИШКЕК, 20-апр. — Sputnik. Баткенде талкаланган үйлөрдү куруу милдетин алган субподрядчы "Доор курулуш" компаниясынын жетекчиси курулушчуларга акчасын бербей качып жүрөт. Бул тууралуу Жогорку Кеңештин депутаты Нурлан Ражабалиев билдирди.
"Баткенди калыбына келтирүү жумуштары жакшы эмес. Башкы подрядчы "Аманат курулуш инвест" жалпы жумуштарды алып, "Доор курулуш" деген субподрядчыга берген. Өз кезегинде ал кайра суб-субподрядчыларга 5-10дон үйдү таратып салган. Ошентип отуруп эки айда деген жумушту жети айдан бери бүтүрө элек", — деди Ражабалиев.
Эл өкүлү мунун айынан тургундар үйлөрүнө кире албай, куруучулар эмгек акысын ала албай жүргөнүн белгиледи.
"Канчалаган дүкөндөрдөн материалдарды алышкан, тамак бышырган ашпозчулары болгон экен. Субподрядчы менен суб-субподрядчылардын ортосундагы маселеден биздин эл кыйналып жатат. Акчасын алган, бирок ал жакка жеткирип берген эмес, качып жүрөт дейт. Андан сырткары, Өзбекстандан куруучулар келип иштеген экен. Аларга да акчасы берилбей кете албай жүрүшөт. Ушул маселени өкмөт катуу көзөмөлгө алып берсеңер", — деди депутат.
Белгилей кетсек, Баткенде талкаланган 418 үйдү курууга республикалык бюджеттен 1,3 миллиард сом бөлүнгөн. Президент Садыр Жапаров жаңы жылга чейин баарын куруп бүткөрүүгө тапшырма берген. Бирок ал аткарылбай, кийинчерээк башкы подрядчы "Аманат курулуш инвест" компаниясы март айында иш толук соңуна чыгарын убадалаган. Бирок мөөнөтү кайра-кайра жылып отуруп, эми майда бүтөрү айтылууда. Курулуш иштерин көзөмөлдөө президенттин иш башкармалыгына тапшырылган.