БИШКЕК, 19-апр. — Sputnik. Жыл башынан бери өлкөдө ден соолугунан мүмкүнчүлүгү чектелген 1892 адам протездик-ортопедиялык буюмдар менен камсыздалды. Бул тууралуу Эмгек, социалдык камсыздоо жана миграция министрлиги маалымдады.
Билдирмеге ылайык, майыптыгы барлар үчүн зарыл буюмдар Республикалык протездик-ортопедиялык мекемесинен чыгарылат.
"Министрлик тарабынан керектүү буюмдарды даярдоо, майыптар арабасын куроо боюнча туруктуу иштер аткарылууда. Азыркы тапта ортопедиялык бут кийимдердин сырткы көрүнүшүн жакшыртуу иштери жүрүп жатат, протездик буюмдарды пайдалануунун жаңы технологиясы өздөштүрүлүп, колдонулууда", — деп айтылат маалыматта.
Республикалык протездик-ортопедиялык буюмдар мекемесинин адистери биринчи жолу балдар үчүн заманбап, кыймылы оңой "Киби" кол протезин чыгарышкан. Заманбап жана жеңил протез инновациялык "Сколково" борборунун резиденти болгон "Моторика" компаниясынын компоненттеринен даярдалган.
"Моторика" компаниясы, Кыргыз-Россия өнүктүрүү фонду жана Республикалык протездик-ортопедиялык буюмдар мекемесинин үч тараптуу келишиминин алкагында кыргызстандык протезчилер жана техниктер атайын окуудан өтүшүп, кол жана билектин "Киби" протезин чыгарууга сертификат алышты.
Жыл башынан бери кресло-араба менен ден соолугунан мүмкүнчүлүгү чектелген 35 адам камсыздалса, анын ичинен 14ү көп функционалдуу болуп саналат.
"Мындан тышкары, жыл башталгандан бери майыптыгы бар 86 адам реабилитациялык курстан өттү, 34ү компьютер колдонууну, кийим бычууну жана тигүүнү үйрөндү", — деп билдирди министрлик.