БИШКЕК, 18-апр. — Sputnik. Бийлик "Социалдык ипотека" деп аталган ипотекалык жаңы багытты кийирип жатат. Бул тууралуу Мамлекеттик ипотекалык компания билдирди.
Жылдык үстөгү 4 пайыздык ипотекалык кредитти бир гана бюджеттик сферанын адамдары эмес, жеке сектордо иштегендер дагы ала алат.
Кредит алууга кимдер кезекке тура алат?
Беш же андан көп бала баккан үй-бүлөлөр;
Ден соолугунан мүмкүнчүлүгү чектелген адамдар же майып адамды баккан камкорчу тарап;
Толук эмес үй-бүлөлөр (өспүрүм баланы атасы же энеси жалгыз баккандар);
Айыл жергесинде иштеген жаш адистер.
Турак жай банктардын катышуусуз, ижарага алып андан ары сатып алуу жолу менен берилет. Чет өлкөлөрдө иштеген республиканын жарандары да мамлекеттик ипотекалык насыяларды ала алышат.