БИШКЕК, 14-апр. — Sputnik. Президенттин Ош облусундагы өкүлүнүн биринчи орун басары Данияр Жаныкуловдун кабинетинде бирөөлөрдөн конверттерди алып, таңгаакталган акчаны санап отурган видеосу соцтармакка тарады.
Кадрдан бир киши келип аткаминерге "чай ичип коюңуз" деп конвертти колуна карматып жатканын көрүүгө болот. Анан экөө кандайдыр бир жер маселеси боюнча сүйлөшүшкөн. Андан соң иш бөлмөсүндө Кара-Суу районунун акими Турусбек Ногоев отурганы көрүнөт, ага Жаныкулов калың конвертти карматкан. Кийинки кадрдан катчысы баштыкка салынган бир коробканы алып кирип берген. Артынан эле облустук администрациянын маалымат катчысы Эрмек Муратбек уулу келген. Ага Жаныкулов бир таңгак акчаны карматып жатат. Ага кошумча кылып мурдараак катчысы алып кирген коробканын ичинен төрт-беш таңгак акча чыгарып, бир бөлүгүн берген.
Мындай видео кечээ, 13-апрелде, кечинде тараган, көп өтпөй эле түндө Жаныкулов өз версиясын жарыялады. Ал видео бир жыл мурунку экенин айтып, жадагалса кабинетине камераны өзү койдурганын билдирди. Кадрдан көрүнгөн каармандарды дагы чогултуп пикирин айттырган.
Данияр Жаныкулов эмне деди:
Былтыр бутума операция жасатып ооруканага жатып чыккам. Биринчи кирген адам Керим Макеев деген байкебиз "абалыңды сурап бара албадым, ушул акчага чай ичип кой" деп шашып кетип жатып, "бир маселе болуп жатат, жардам бер" деп жумуш дайындаган. Колдон келишинче аракет кылам дегем. Коррупциялык элемент же башка маселе жок;
Кара-Суунун акимине элден келген арыздарды бергем. Андай кайрылууларды минтип конверттерге салып жөнөтүшөт. Ошону мен берип Турусбек Ногоев чөнтөгүнө салып жатканы акча деген маселе болбошу керек;
Маалымат катчыга карматкан акча боюнча Ош облусун өнүктүрүү багытында 15 мүнөттүк ролик тартуу үчүн жеке компанияларды жалдап 2000 долларга сүйлөшкөнбүз. Сомго которгондо 140 миң болот экен, ошонун 100 миң сомун берип жаткам;
Уинстон Черчиллдин "чындык чыркырап ордунан турганча, калп дүйнөнү айланып чыгат" деген сөзү бар, тилекке каршы, азыр ушундай заманда жашап жатабыз. Адамды жамандоо, каралоо оңой болуп калды. Мезгил таразалап, чындык ким тарапта болгонун айтат. Мени колдоп бир жыл 9 айдан бери иштешкен адамдардын баарына ыраазымын, мындан ары дагы Кыргызстандын келечеги үчүн кайсы жерде болбойлу, кызматыбызды кылганга даярбыз;
Жер мафиясы менен күрөшкөнгө толук аракет кылдык, бирок жеңип чыгуу колубуздан келбеди;
Ал эми кутучанын ичиндеги таңгакталган акчалардын чоо-жайы тууралуу айткан жок.
Ал арада бүгүн эртең менен президент Ош облусундагы өкүлү Зиядин Жамалдиновду, биринчи орун басары Данияр Жаныкуловду кызматтан бошотту.