БИШКЕК, 10-апр. — Sputnik. Бойго атайылап уул же кызды бүтүрүүгө болобу? Бул тууралуу "Доктор Питер" басылмасына берген маегинде акушер-гинеколог, медицина илимдеринин кандидаты Алла Мещерякова айтып берди.
"Уул же кыздуу болуу эркекке гана байланыштуу болот. Адамда 46 хромосома бар, дал ошолор түйүлдүктүн жынысын аныктайт. Эгер ХХ болсо кыз, XY болсо, анда эркек бала төрөлөт. Дегеним, сперма клеткалары Х же Y хромосомасын алып жүрөт. Илимий көз караштан алганда Y-сперматозоиддер азыраак жашайт", — дейт гинеколог.
Болочоктогу наристенин жынысын пландап жүргөндөр төмөнкү эрежелерди унутпашы керек:
Эркек — жогоруда айтылгандай эркек балалуу болууга шарт түзчү Y-сперматозоиддердин аялдын организмине түшкөндөн тарта өмүрү саат санап кыскарат. Андыктан жыныстык катнаш овуляция күндөрү болгону жакшы.
Кыз — эгерде сиз кыздуу болгуңуз келсе, анда овуляцияга бир нече күн калганда жыныстык катнаш болгону туура. Y-сперматозоиддер өлүп калат дагы, кыздуу болуу мүмкүнчүлүгү жогорулайт.
Адис кошумчалагандай, бул ыкма 100 пайыз кепилдик бербейт, бирок уул же кыздуу болуу мүмкүнчүлүктөрүн алда канча көбөйтөт.