БИШКЕК, 6-апр. — Sputnik. Транспорт министрлигине караштуу Салмак көзөмөлдөө департаментинин Кара-Көл шаарындагы салмак-габаритти көзөмөлдөө постунда туруктуу коррупциялык схема аныкталып, аталган министрликтин 13 кызматкери кармалды. Бул туурасында УКМКдан кабарлашты.
"Ушул жылдын 4-апрелинде жүк ташуучу унаанын айдоочусунан ашыкча салмак үчүн беш миң сом өлчөмүндө кезектеги параны алып жаткан жеринен Кара-Көл шаарындагы салмак-габаритти көзөмөлдөө постунун сегиз кызматкери, ошондой эле посттун улук нөөмөтчүсү, Транспорттук көзөмөл башкармалыгынын башчысы кармалды. Бул иш боюнча жалпысынан Транспорт министрлигинин 13 кызматкери кармалды", — деп айтылган маалыматта.
УКМК жарыялаган видеодон бир кызматкердин көзөнөк терезеден берилген акчаны чалкасынан жаткан тейде алганы жашыруун тартып жаткан камерага түшүп калган.
Транспорт министрлигинин кызматкерлери жүк ташуучу автоунаалардын айдоочуларынан тоскоолдуксуз өткөрүү жана ташылып жаткан жүктүн уруксат берилген чегинен ашкан салмагын жашыруу үчүн системалуу акча талап кылгандыгы аныкталды. Ашыкча салмактын категориясына жана даражасына жараша посттун кызматкерлери ар бир автоунаадан 500 сомдон 10 миң сомго чейин акча каражатын алып турушкан.
Бул кылмыштуу ишке Транспорт министрлигинин борбордук аппаратынын катыштыгы болгон.
"Транспорттук көзөмөл башкармалыгынын айрым кызматкерлери да катышып, алар аралыктан мониторинг жүргүзүү жана жүк ташуучу автоунаалардын ашыкча салмагын белгилөө менен бирге бузууларды жашыргандыгы үчүн посттун кызматкерлеринен системалуу түрдө "өз үлүшүн" алып турушкан", — деп айтылган маалыматта.
Коррупциялык схеманы уюштургандар атайын кызматтын өкүлдөрүнө пара берүүгө аракет кылышкан.
"Алар өздөрүнүн кылмыштуу аракеттерин тоскоолдуксуз ишке ашырып туруу максатында УКМК кызматкерлерине жашырып туруу өтүнүчү менен кайрылып, бир нече жолу пара берүүгө аракет кылышкан. Бул аракеттер да белгиленген жана документтештирилген", — деп айтылган таратылган маалыматта.
Транспорт жана коммуникациялар министрлигине караштуу Салмак-габаритти көзөмөлдөө департаменти автотранспорт каражаттарынын салмагы жана жалпы көрсөткүчүнүн ашып кетүүсүнө жол бербөө, ошондой эле жолдордун жана жасалма курулуштардын коопсуздугун камсыздоо максатында түзүлгөн.