БИШКЕК, 17-мар. — Sputnik. Кытай төрагасы Си Цзиньпин 20-22-мартта Россия лидери Владимир Путиндин чакыруусу менен Москвага барат. Бул тууралуу Кремлдин маалымат кызматынан кабарлады.
"Сүйлөшүүлөрдө Россия жана Кытайдын ар тараптуу өнөктөштүк менен стратегиялык өз ара кызматташуусун мындан ары өнүктүрүүнүн актуалдуу маселелери талкууланат" , — деп айтылган маалыматта.
Сапар учурунда Москва менен Пекиндин эл аралык аренадагы кызматташуусун тереңдетүү боюнча да пикир алмашуу болмокчу. Сүйлөшүүлөрдүн жыйынтыгында эки тараптуу кызматташуудагы маанилүү делген документтерге кол коюлат.
Кытай ТИМинин расмий өкүлү Ван Вэньбинь Кытай лидеринин Россияга келиши достуктун сапары болорун жана эки мамлекеттин ортосундагы өз ара түшүнүшүүнү, ишенимди мындан ары да бекемдей турганын белгилеген. Анын айтымында, бул сапар Москва менен Пекиндин мамилелерине жаңы дем берип, эки элдин ортосундагы мурдатан келе жаткан достуктун саясий өңүтүн бекемдейт.
Кытай ТИМинен Си Цзиньпиндин Путин менен аймактык, эл аралык маселелер жана эки тараптуу мамиле боюнча терең, маңыздуу пикир алмашуу күтүлүп жатканын айтышкан. Тышкы ведомство, андан сырткары, Кытайдын Украина боюнча объективдүү позицияны карманарын жана сүйлөшүүлөрдү демилгелөө жаатында конструктивдүү ролду ойной турганын белгилеген.
Путин менен Си Цзиньпин соңку ирет 2022-жылдын декабрында видеоконференция менен сүйлөшкөн. Анда Россия лидери Кытайдын төрагасын Москвага чакырган.
Путин сапар орус-кытай алакаларындагы байланыштын бекемдигин көрсөтүп, эки тараптуу мамиледеги башкы саясий окуя болорун айткан.