БИШКЕК, 14-мар. — Sputnik. Евробиримдикти, АКШны кошкондо кырктан ашык мамлекеттин өкүлдөрү бүгүн Москвада Русофилдердин эл аралык кыймылын түптөө боюнча съездде (конгресс) жолугат. Бул туурасында РИА Новостиге иш-чараны уюштуруучулар билдирген.
"Бүгүнкү күндө ал тургай Батыш мамлекеттеринде да өздөрүн "русофилбиз" деп атоодон чочулабаган адамдар бар. Ким биздин өлкөнү, анын тарыхын, маданиятын жакшы көрсө, өлкөнүн жана анын элдеринин салттуу баалуулуктарына негизделген Россиянын көп уюлдуу адилеттүү дүйнөлүк тартипти орнотуу боюнча күрөшү менен тилектеш болсо, ошол адамдар келишти. Дал ушул кишилер 14-мартта Москвада Русофилдердин эл аралык кыймылынын (РЭК) конгрессинде жолугат. Бул түптөөчүлөрдүн кездешүүсү", — деп РИА Новостиге айтып берген уюштуруучулардын өкүлү.
Анын билдиргенине караганда, РЭК "Россияны жакшы көргөн, орус маданиятына, орус тилине кызыккандардын башын кошуп", ар кыл диндеги жана саясий ынанымдагыларды консолидация кылат.
Уюштуруучулардын маалыматына караганда, конгресс конокторунун арасында кырктан ашык мамлекеттен, анын ичинде АКШдан, Евробиримдик өлкөлөрүнөн, Африка, Азия мамлекеттеринен келген өкүлдөр бар.
Съездде РФ ТИМинин жетекчиси Сергей Лавровдун, "Царьград" компаниясынын башчысы, бүткүл россиялык элдик собордун төрагасынын орун басары Константин Малофеевдин, ТИМдин АКШ, Япония менен гуманитардык байланыштар жаатындагы атайын өкүлү Стивен Сигалдын сүйлөшү күтүлүүдө.