БИШКЕК, 14-мар. — Sputnik. Менингит — мээнин жана жүлүндүн былжыр челдеринин сезгениши менен байланышкан оор илдет. Саламаттык сактоо министрлигинин алдындагы Ден соолукту чыңдоо борбору аталган оорунун кооптуулугун белгилеп, аны алдын алуу жолдорун тизмектеди.
Кээде бул оору адамда өзү пайда болушу мүмкүн, айрым учурда башка оору өтүшүп менингитке айланат.
"Инфекция бейтаптан же менингококк инфекциясын алып жүрүүчүлөрдөн жугат. Ал аба аркылуу, жөтөлгөндө, сүйлөшүүдө, бир идиштен тамактанууда, суу ичүүдө да жугушу мүмкүн. Көп учурда аталган илдеттен балдар жабыркайт", — деп айтылат маалыматта.
Борбордон белгилешкендей, бактериялык жана вирустук менингиттин белгилери бири-биринен айырмаланат. Мисалы, бактериялык менингитте тарамыштар түйүлүп, териге жылдызча сыяктуу бүртүкчөлөр чыгат. Вирустук менингит суук тийгенден улам пайда болушу мүмкүн. Бактериялык менингит оор формада өтүп нерв системаларын жабыркатат, айрым учурда адамдын өмүрүн алган көрүнүштөр менен аяктайт.
Оорунун жалпы белгилери:
дене табы көтөрүлөт;
териси купкуу болуп кетет;
баш катуу ооруйт;
моюн тырышат;
чыйрыгат жана тарамыштар түйүлөт;
табит жоголот;
жарыкты жана үндөрдү жактырбайт (бул илдет менен ооругандар көзүн жумуп, киши менен сүйлөшкүсү келбейт калат);
дем алуу ритми өзгөрөт;
адам жаткан же отурган абалын өзгөрткөндө, башы катуу ооруганда кусат;
эсин жоготот.
Дарыгерлер бул белгилерди байкаган учурда кечиктирбестен ооруканага баруу зарылдыгын эскертишти.
"Менингитти алдын алуунун эң жакшы жолу – иммундук системаны жакшыртуу, сергек жашоо образы, туура тамактануу, дене тарбиялык көнүгүүлөрдү жасоо, таза абада сейилдөө, чуркоо. Имараттын ичинен чыкпай отура берүү же чоң жамааттын арасында иштеп, жогоруда саналган аракеттердин бирин да жасабоо да оорунун пайда болушун шарттайт. Бөлмөнү желдетип, бат-баттан чаңды сүрүп, полду жууп туруу сунушталат. Колду, бетти бат-баттан жууп туруу да кажет, мурундун ичин да суу менен чайкоо зарыл экендигин эстен чыгарбаңыздар. Дагы бир маанилүү жагдай – колду оозго салуудан да менингит жугушу мүмкүн", — дешти борбордон.