БИШКЕК, 13-мар. — Sputnik. Борбор калаадагы ресторандагы мушташ боюнча милиция эки кишини кармады. Бул туурасында Бишкек ШИИБдин маалымат кызматы кабарлады.
Шектүүлөрдүн 34 жана 35 жашта экендигин билдиришип, “Бейбаштык” беренеси боюнча иш козголгонун айтышты.
Жабырлануучу башынан жаракат алып Улуттук госпиталга жаткан жана кол салган кишинин үстүнөн арыз жазган. Шаардык милициядан тергөө иштери жүрүп жатканын кошумчалашты.
Эске салсак, кечээ, 12-мартта, социалдык тармактарга ЖК депутаты Жаныбек Абировго окшогон адамдын бир нече кишилер менен мушташка аралашып, бир адамды сабап жаткан видеосу тараган.
Андан сырткары, социалдык тармактарга күзөт агенттигинде иштеген, аты аталбаган кишинин чатакка байланыштуу билдирүүсү жазылган. Анда ресторанга чакырык менен жетип барган ыкчам аракетке келүүчү топтун эки кызматкерин ошол жерден онго чукул адамдын сабаганы айтылган.
Октябрь райондук ИИБ 12-мартта милицияга жабырланган Д.А. аттуу киши кайрылгандыгын билдирди. Жабырлануучуну болжол менен саат 03:30да Элебаев көчөсүндөгү ресторанда белгисиз киши сабагандыгын билдирген. Ал адам башынан жаракат алып ооруканага кайрылып, учурда текшерүү башталып, тергөө жүрүп жатканы айтылган.
Жаныбек Абиров азырынча видео боюнча комментарий бере элек.
Ал арада президент Садыр Жапаровго мушташуу жана Жогорку Кеңештин депутаты Жаныбек Абиров тарабынан жарандын сабалуу фактысы тууралуу маалымдалган. Ал Ички иштер министрлигине болгон окуяны ар тараптуу иликтөөнү тапшырган.