БИШКЕК, 13-мар. — Sputnik. Жетектөөчү "Грузин кыялы" партиясы өлкөдө экинчи фронтту ачууга жол бербейт. Бул тууралуу аталган мамлекеттин өкмөт башчысы Ираклий Гарибашвили өлкөнүн "Имеди" телекомпаниясына маек берип жатып билдирген.
"Украинадан бир нече ондогон адамдар келди. Аларга кайрылгым келип турат: бир нерсе болуп кетет деген куру кыялга жетеленбегиле. Украинадагы аскерлерге үй-жайына аман-эсен кайткыла деген каалоом бар. Бирок ыплас чагымчылыкка алдырбагыла. Биз алар ойлогондон да көп нерсени билебиз. Бүгүн "Грузин кыялы" бийликте болгондуктан мамлекет жогорку деңгээлде турат. Экинчи фронтко жол бербейбиз, бул ишке ашпай турган нерсе", — деген ал.
Грузия парламентинин вице-спикери Гия Вольский 10-мартта өлкөгө экс-президент Михаил Саакашвилинин тарапташтарынан турган топ келгендигин, алардын Украинада Киев тарабында кармашып жаткандар, тагыраагы, Украинанын Куралдуу күчтөрүнүн тарапташтары экендигин билдирген. Анын айтымына караганда, келгендердин максаты — революциялык процессти колдоо.
Премьер аскерлердин нааразылык акцияларга катышуусун такыр туура эмес деп, аларды Грузияда башаламандыкты уюштуруу аракетинен баш тартууга чакырган.
Эске салсак, 2023-жылдын 6-7-март күндөрү борбор калаа Тбилисидеги парламенттин имаратынын алдында чет элдик агенттер жөнүндөгү мыйзам долбоордун биринчи окууда кабыл алынышына каршы акциясы өткөн. https://sputnik.kg/20230309/tbilisidegi-bashalamandyk-1073438044.html Анда митингчилер менен полиция өкүлдөрү кагылышкан. Спецназ суу аткычтарды колдонуп митингчилерди кармап кеткен. Кийинчерээк тартип сакчылары парламенттин имаратына жакын аймактын баарын өз көзөмөлүнө алышканы белгилүү болгон.
"Чет элдик таасирлердин ачыктыгы жөнүндө" мыйзам долбоорунда чет өлкөлөрдөн каржыланган бейөкмөт уюмдардын, ЖМКлардын жана субъектилердин реестрин түзүү каралган. Демилгечилер бул мыйзам долбоор учурда АКШда иштеп жаткан мыйзамга караганда кыйла жумшак экенин айтышса, оппозиция менен Грузиядагы америкалык элчи Келли Дегнан төгүндөп чыгышкан. Алардын айтымында, документ чет элдик агенттер жөнүндөгү россиялык мыйзамды кайталап калган.
Тбилисидеги башаламандыкты жараткан чет элдик агенттер тууралуу мыйзам долбоору Грузиянын парламентинен чакыртып алынганы "Грузин кыялы" башкаруучу партиясы менен "Элдин күчү" партиясынын биргеликте жасаган билдирүүсүндө айтылганын РИА Новости жазды.