БИШКЕК, 13-мар. — Sputnik. Жогорку Кеңештин депутаты Элвира Сурабалдиева сунушталып жаткан салыктын жаңы бир талабын айтып нааразы болду.
Учурда парламенттин тармактык комитетинде Салык кодексин өзгөртүү боюнча мыйзам долбоору экинчи окууда каралып жатат. Эл өкүлү "жылдык жүгүртүүсү 8 миллион сомдон ашпаган жеке ишкерлердин бирөөнү жалдап иштетүүгө укугу жок деп жатасыңар, туурабы ушул?" деп сурады.
Ага экономика жана коммерция министри Данияр Амангелдиев "ооба, баары туура" деген жооп берди.
"Эми бир адам эгин талаасында жалгыз иштеши керекпи? Ал эми дүкөнчү 365 күн эч жакка чыкпай отурабы? Эгер ордуна бирөөнү коюп, башка жумушу менен кетсе юридикалык жак катары карап айып саласыңар. Бул кандай болот, ал ооруп калышы мүмкүн, бир жакка барууга туура келет", — деди Сурабалдиева.
Анда Амангелдиев патент менен иштегенде дагы бир адамга жазылып, аны менен экөө соода кылганга мүмкүнчүлүгү жок экенин, мында да ошол эле принцип колдонулуп жатканын белгиледи.
"Анда жүрүңүз, экөөбүз тең каалаган шаарга баралы да дүкөндөрдү көрөлү. Иш жүзүндө кандай болуп жатат, кичинекей киоскиде, эгин талаасында бир адам 365 күн иштебейт. Ал бирөөнү жалдайт, карындашыбы же тууганыбы. ким болсо да. Анан аларды автоматтык түрдө юридикалык жакка которуп жатасыңар. Мындай учурда жеринде салыкчынын колуна акча берип бүтүрүшөт. Региондо чуу түшүп жаткан элди тынчтандыруунун ордуна Экономика министрлиги талаптарды катаалдаштырууга барып жатасыңар. Мунуңар кичинекей иш кылып, нанын таап жеп жаткан катмарга таасир этет", — деди депутат.