БИШКЕК, 8-мар. — Sputnik. "Түндүк агым" түтүктөрүндөгү жардыруу боюнча акыркы билдирүүлөр — уюшулуп чыгарылган материалдардын тобу. Бул тууралуу Россия президентинин маалымат катчысы Дмитрий Песков айтканын РИА Новости жазды.
Анын айтымында, терактыны жасагандар элдин көңүлүн башкага бурууга аракет кылып жатышат.
Эскерте кетсек, кечээ New York Times гезити газ түтүктөрүн жардыруунун артында Украинаны колдогон айрым топтор турарын, аларды Киев бийлиги билбеши мүмкүн экенин айгинелеген маалыматтар тууралуу жазып чыккан. Ал эми германиялык Zeit басылмасы түтүккө жасалган чабуулдун изи Украина тарапка кетип жатканын билдирди.
Песков басылма таянган америкалык чиновниктер кандайдыр бир иликтөө жүргүзбөй туруп "Түндүк агымдагы" жардыруулар боюнча пикир билдириши акылга сыйбай турганын белгилеген. Анын айтымында, Россияга мурдагыдай эле иликтөөгө катышууга мүмкүнчүлүк берилбей келет. Бир нече күн мурун Москва Копенгаген менен Стокгольмдон иликтөөгө катышууга тыюу салган нота алган.
"Таң калычтуу да эмес, болуп көрбөгөндөй кылмыш жыттанып жатат. Жок эле дегенде түтүккө акционер болгон өлкөлөр менен БУУ кырдаалдан чыгуунун жолун билген тараптардын катышуусу менен иликтөө жүргүзүшү керек эле", — деди Песков.
Ал эми РФ ТИМинин расмий өкүлү Мария Захарова "Түндүк агымдагы" жардыруулар боюнча материалдар Батыш ЖМКларына иликтөө жүргүзүүнү каалабай, коомчулукту адаштырууну көздөгөндөр чыгарып жатат деген пикирин билдирди.
"Андай маалыматтардын чыгып кетүүсүнө ким жол берип жатканы кызык. Окуянын укук талаасында иликтенишине каршы чыгып, коомчулуктун көңүлүн башка нерсеге бурууга аракет кылгандар жол берүүдө", — деп жазган Захарова.
Ал окуяга тиешеси бар батыш мамлекеттери Россиянын расмий сурамына жооп кайтарып, америкалык журналист Херштин айткандарын иликтөөгө алышы керек деген пикирде.
Сеймур Херш 8-февраль күнү "Түндүк агымдагы" жарылуу боюнча өз иликтөөсүн жарыялап, россиялык түтүктөрдүн алдына жардыруучу заттар 2022-жылы июнда АКШнын Аскер-деңиз күчтөрү тарабынан коюлганын айтып чыккан. Аларга норвегиялык адистер көмөк көрсөткөнү белгиленген.
Херштин маалыматы боюнча, операция боюнча чечимди АКШ президенти Жо Байден тогуз айлык талкуудан кийин кабыл алган. Кийинчерээк Пентагон жардырууга АКШнын тиешеси жок деген билдирүү жасаган.