БИШКЕК, 7-мар. — Sputnik. Салык кодексинин жаңы долбооруна ылайык, жылдык жүгүртүүсү 50 миллион сомго чейинки ишкерлер 1 пайыздык ставка менен салык төлөйт. Бул тууралуу министрлер кабинетинин төрагасынын орун басары Адылбек Касымалиев Sputnik Кыргызстанда өткөн брифингде билдирди.
© Sputnik / Акбар Акжигитов
Касымалиев Салык кодексин өзгөртүү долбоору учурда Жогорку Кеңештин кароосунда турганын эске салды. Анда бизнеске жеңилдетилген шарттарды түзүү каралган. Мисалы, президент жылдык жүгүртүүсү 8 миллион сомго чейин ишкердик чөйрөсүн салыктан бошотууну, бирок ККМди милдеттүү түрдө колдоно тургандай кылып мыйзамды өзгөртүүгө тапшырма берген. Буга чейин мамлекет башчынын жарлыгы менен 2022-жылы салыктан бошотулган, андан соң мөөнөтсүз түрдө бошотулганы белгиленди.
Жүгүртүүсү 50 миллион сомго чейинки бизнес үчүн бирдиктүү салык түрүндө жеңилдетилген норма киргизүү сунушталууда. Жүгүртүүсү 8ден 30 миллион сомго чейинкилерге — 0,5 пайыз, 30дан 50 миллионго чейинкилерге — 1 пайыз.
Касымалиев аталган мыйзам долбоорун парламент 13-мартта экинчи окууда карай турганын белгиледи.