БИШКЕК, 5-мар. — Sputnik. Президент Садыр Жапаров бүгүн, 5-мартта, кыргызстандыктарды Ак калпак жана улуттук кийимдер күнү менен куттуктады.
“Ата-бабаларыбыздын бизге – урпактарга калтырган табериги улуттук маданиятыбыздын маанилүү бөлүгү, улуттук аң-сезимдин негизи болуп, муундардын жана доорлордун руханий байланышын бекемдөөдө, өлкөбүздүн маданий саясатын калыптандырууда негизги ролду ойнойт”, — деди Жапаров.
Ошондой эле ал улуттук кийим – бул жөн эле кийим эмес, ал элдин тарыхы, маданияты, каада-салты жана жашоо-турмушу экенине токтолду.
“Кыргыздын ак калпагынын уникалдуулугу – анын азыркы күндө дагы калың элдин арасында колдонулуп, тарыхый салттарды улап келе жатканында. Бүгүнкү күндө эгемендүү мамлекет катары таанылып, заман талабына ылайыкташкан кезде дагы жалпы кыргызстандыктар элибиздин салттуу кийимдерин урматтап, муундан-муунга аяр өткөрүп келе жатканы мунун айдан ачык далили. Ата-бабаларыбыздан калган таберикти аздектеп, аны кийинки муундарга өткөрүп берүү – бүгүнкү кыргызстандыктардын ар биринин ардактуу милдети!” — деди өлкө башчысы.
Мындан тышкары, ал бүгүнкү майрам күнүндө маданий мурастарды алып жүрүүчүлөр болгон кол өнөрчүлөргө терең ыраазычылык билдирип, алардын колунан чыккан салттуу кийимдер улуттун улуулугун дүйнө жүзүнө таанытып, тарыхый жана маданий баалуулуктарыбызды даңазалап жатканын кошумчалады.
Өлкөдө 2011-жылдан бери 5-март — Ак калпак жана улуттук кийимдер күнү деп белгиленип келе жатат.