БИШКЕК, 4-мар. — Sputnik. Кассаны көзөмөлдөөчү машиналар (ККМ) ишке киргизилгенден тартып салыктык түшүүлөрдүн өсүү динамикасы биздин туура жолдо экенибизди көрсөтүп турат. Бул тууралуу министрлер кабинетинин төрагасы Акылбек Жапаров билдирди.
Жапаровдун катышуусундагы кезектеги отурумда 14 маселе каралган.
"Акыркы жылдары мамлекет бир дагы жаңы салыкты киргизген жок. Болгону, ишкерлер учурдагы мыйзамдарга ылайык, кассаны көзөмөлдөөчү машиналарды орнотуп, ал аркылуу иштөөсүн суранабыз. ККМ ишке киргизилгенден тартып салыктык түшүүлөрдүн өсүү динамикасы биздин туура жолдо экенибизди айгинелейт. Бизнес ар кандай "күңүрт", же көмүскө схемаларды колдонбостон, ачык-айкын жана чынчыл иштеши керек", — деди ал.
Акылбек Жапаров белгилегендей, буга чейин бир топ финансылык каражаттар мамлекеттик казынага түшпөй келген.
"Азыр салык чогултуу кыйла жакшырды. Биз фискалдык системаны мындан ары да жакшыртууну улантабыз. Дал ушул каражаттарга жолдор жана көпүрөлөр, жаңы социалдык объектилер курулуп, пенсия менен социалдык жөлөк пулдардын өлчөмү көбөйтүлүп, бюджеттик мекемелердин кызматкерлеринин жана аскер кызматкерлеринин эмгек акысы көбөйүүдө", — деди министрлер кабинетинин башчысы.
Жапаров ар бир жаран, анын ичинде ишкерлер да салыктык чегерүү жана бажы төлөмдөрү түрүндө түшкөн каражаттар кандай максаттарга жумшалып жатканын так түшүнүү керектигин айткан.