Туура тамактануу — бул организмди муктаж болгон заттар менен камсыздоо экенин Алтынай Молдобек кызы Sputnik Кыргызстан радиосунун эфиринде маек куруп жатып билдирди.
Анын айтымында, тамактанып жатканда үч заттын тамак-ашта болушу өтө маанилүү.
"Адам тамактануу аркылуу гана өсүп-өнүгөт. Туура тамактануунун негизинде адам жашоосун улантып кете алат. Туура тамактануу деген өзү эмне? Бул — организмди муктаж болгон заттар менен камсыздоо. Туура тамактанууда эң керектүү үч затка маани берүү керек. Алар: белок, май жана углевод. Белокту негизинен эт менен балыктан ала алабыз. Белок менен майдын рациону суткасына 80-100 граммды түзүш керек. Май болсо адамга энергия берет. Ал эми углевод зат алмашууга өбөлгө түзүп, энергиянын бир булагы болуп саналат", — деди дарыгер.
Ал туура тамактануу үчүн тамактануу убактысы да чоң роль ойной турганын кошумчалады.