БИШКЕК, 1-мар. — Sputnik. Кадамжай райондук соту 14 жаштагы кыздын өлүмүнө айыпталгандарга карата өкүм чыгарды. Бул тууралуу Баткен облустук соту билдирди.
Маалыматка караганда, сот отуруму 28-февралда өткөн. Ага ылайык, колго түшкөн маалда 11-класста окуп жүргөн Б.Э. 122-берене ("Адам өлтүрүү"), 154-берене ("Зордуктоо"), 155-берене ("Сексуалдык мүнөздөгү зомбулук аракеттер") жана 165-берене ("Адам уурдоо") боюнча күнөөлүү деп табылып, 10 жылга эркинен ажыратылды. Белгилей кетсек, окуучуга өкүм чыгарууда 108-берене эске алынган. Ага ылайык, жаш бала 10 жылдан ашык убакытка кесилбейт.
Ал эми 1995-жылкы Г.Д. 165-берене ("Адам өлтүрүү"), 154-берене ("Зордуктоо"), 155-берене ("Сексуалдык мүнөздөгү зомбулук аракеттер"), 122-берене ("Адам өлтүрүү") жана 180-берене ("Кылмыш жасоого жашы жете электи тартуу") боюнча күнөөлүү деп табылып, мүлкүн конфискациялоо менен өмүр бою эркинен ажыратылды.
Эске салсак, 2022-жылдын 4-сентябрында Кадамжай районунда сел өтүүчү тоннелдин ичинен 14 жаштагы кыздын сөөгү табылган. Ал колу артка жип менен байланып, муунтулган абалда жаткан. Кылмышка шектүү катары Кадамжайдын Халмион айыл аймагынын 24, 25, 27 жаштагы тургундары кармалган. Кийин төртүнчү шектүү катары 11-класстын окуучусу колго түшкөн.
Эки шектүү тергөө абагында жатканда өздөрүн асып салган.
Бул трагедия боюнча үн каткан Садыр Жапаров кылмышкерлер өтө катуу жаза алуу керектигин жана аталган иш жеке көзөмөлүндө болорун айткан.