БИШКЕК, 1-мар. — Sputnik. Бишкек шаарынын мэри Эмилбек Абдыкадыров ыш маселеси тууралуу айтып жатып, борбор калаадагы үйлөрдү көмүр менен жылыткан 22 от казанды газга которуу чечими кабыл алынганын айтты.
"Буга чейин аларда жылына 3-4төн газга которууну караган программа бар экен. Маселе курч туруп жаткандан кийин 22 от казандын баарын быйыл газ менен иштөөгө которобуз. Аны үч-төрт жылга созбош керек. Себеби экология менен ыш маселеси сиздер менен биздин ден соолугубуз, балдардын ден соолугу... Андыктан Түркиядан жаңы, заманбап от казандарды алып келдик. Жылытуу маалы бүтөрү менен аларды алмаштырууну баштамай болдук", — деди Абдыкадыров.
Шаар башчысы борбор калаадагы ыш көйгөйү менен күрөшүү боюнча министрлер кабинетине 23 сунуш киргизилгендигин айтты.
Мындан сырткары, ал калориясы аз, бирок ышы көп Кара-Кече көмүрүн Бишкекте колдонууга чектөө киргизүүнү сунуштап, муну өкмөт колдогонун билдирди.
Бишкек шаарынын мэриясы ыштан арылуу боюнча пландары туурасында мурда да кабарлаган эле. Анда Бишкектин тургундарына үйдү келерки кышта Кара-Кеченин көмүрү менен жылытууга тыюу салуу, жаңы конуштардагы көмүр менен иштеген мончолордун ордуна 12 муниципалдык мончо куруу, автотранспорттон чыккан уулуу заттарды азайтууга чара көрүү боюнча айтылган.